Skip to content

بتجيهم؟ الدورة الشهرية عند الرجال

مدة القراءة: 5 دقائق

سألتونا كتير عن الدورة الشهرية عند الرجال، بتجيهم؟ ولا ما بتجيهم؟

لو بتجيهم .. كيف بتكون أعراضها؟ وقديش بتكون مدتها؟ 

قبل ما نبدأ نحكي عن الدورة الشهرية عند الرجال، مهم ننوه أنه الرجال متنوعين. لهيك هاد المقال رح يركز على مناقشة الدورة الشهرية عند أصحاب وصاحبات القضيب، ورح يجاوب على أسئلتكمن بهاد الموضوع.

ورح نحكي فيه بشكل أساسي:

  • شو هي الدورة الشهرية أساساً؟
  • طلعت بتجيهمن؟ 
  • متلازمة الذكر المتنرفز وأعراضها
  • التعامل مع متلازمة الذكر المتنرفز
  • الهرمونات مش محصورة باللي عندهمن مهبل بس!

شو هي الدورة الشهرية؟

في كتير ناس بتظن أنه الدورة الشهرية بتعني الحيض؛ يعني الفترة اللي بينزل فيها دم من المهبل وبتستمر بين 3-7 أيام، ومن هون بيجي المصطلح العامي اللي بيستخدموه كتير (إجت الدورة)، مع أنه بالحقيقة هاي الفترة اسمها الحيض وبتشكل جزء بس من الدورة الشهرية. 

أوف، ليش شوفي غيرها كمان؟ 

في أربع مراحل للدورة الشهرية، الحيض، الطور الجريبي (فترة ما قبل الإباضة)، طور الإباضة، والطور الأصفري (فترة ما قبل الحيض). 

بتمتد الدورة الشهرية وسطياً لـ28 يوم، خلالها بيكون في تغيرات هرمونية تابعة لكل طور من الأطوار الأربعة اللي ذكرناها، وهي الاختلافات بيلحقها تغيرات جسمية ونفسية. 

لو كنتوا حابين تعرفوا معلومات أكتر عن الدورة الشهرية لأصحاب وصاحبات المهبل، خاصة الدورة الشهرية الأولى وكيف بتتعاملوا معها، اقرأوا مقالنا اللي كتبناه مخصوص للأفراد اللي بيتعاملوا مع الدورة الشهرية للمرة الأولى.

لحتى نبدأ نحكي عن الدورة الشهرية لأصحاب وصاحبات القضيب، ضروري نفهم أولاً المعنى ورا الدورة الشهرية، وأنها ما بتقتصر بس على الحيض، لكنها دورة كاملة من التغيرات الجسمية، والتغيرات بـالهرمونات وكل اللي بيلحقها من تأثيرات جسمية ونفسية. 

هلأ تعالوا نحكي ببيت القصيد …

طلعت بتجيهمن؟ 

إذا بدنا نناقش هاد السؤال من منظور الحيض، والتغيرات اللي بتصير على الرحم، والمبايض. فرح يكونا الجواب: لا، ما بتجيهمن.

لأنه غالباً أصحاب وصاحبات القضيب ما بيكون عندهم أصلاً رحم، إلا عند بعض الأفراد بينيي الجنس، اللي ممكن يكون عندهمن قضيب ورحم.

أما إذا بدنا نحكي عنها من منظور التغيرات الهرمونية اللي بيواجهوها …. فهون عنا كتير لنحكيه. 

ومش على مستوى الشهر، على مستوى اليوم كمان. 

فبيواجه أصحاب وصاحبات القضيب تغيرات بالهرمونات الجنسية بأجسامهمن، خاصة مستويات التستوسترون اللي ممكن تختلف بين يوم وتاني، وممكن تختلف خلال اليوم نفسه كمان.

وبيدّعي البعض أنه هاي التغيّرات الهرمونية هي كافية لتسبب أعراض نفسية وجسمية مشابهة لأعراض الـ (PMS) متلازمة ماقبل الحيض، واللي بتتضمن: التعب، الاكتئاب، والتغيرات المزاجية.  

متلازمة الذكر المتنرفز وأعراضها

فمثلاً المعالج النفسي والكتاب جايد دايموند ألّف كتاب كامل اسمه (متلازمة الذكر المتنرفز) The Irritable Male Syndrome (IMS). حكى فيه عن التغيرات الهرمونية اللي بتصير بأجسام أصحاب وصاحبات القضيب، وعن الآثار النفسية والجسدية اللي بتسببها. 

وبالرغم من أنه لسّا مافي إثبات علمي على وجود (متلازمة الذكر المتنرفز). لكن التستوسترون معروف بتأثيره على صحة أصحاب وصاحبات القضيب الجسدية والنفسية، وعلى تغير هاي التأثيرات مع تغير مستوياته بالجسم.

ومستويات التستوسترون بالجسم بتتأثر بعوامل كتيرة منها:

  • العمر (بتبدأ تنقص مستوياته من عمر الـ 30)
  • التوتر 
  • حالات المرض
  • التغيير بالنظام الغذائي/ التغير بالوزن
  • قلّة النوم

لكن التغيرات الهرمونية اللي بتصير بالدورة الشهرية عند أصحاب وصاحبات المهبل،  واللي بتسبب متلازمة ماقبل الحيض إلها نمط واضح، ومنتظم تقريباً. هاد النمط غائب على التغيرات الهرمونية بأجسام أصحاب وصاحبات القضيب، لهيك وبالرغم من التخمينات لوجود الـ IMS، لساتها لحد هلأ غير مثبتة كظاهرة علمية. 

فأعراضها وإن كانت حقيقية (سبب التغيرات بمستويات التستوسترون) لكنها ما بتصير بشكل منتظم أو متوقع.

بتتضمن هي الأعراض:

  • التعب
  • الاكتئاب
  • النرفزة
  • قلة الثقة بالنفس
  • انخفاض الرغبة الجنسية
  • الحساسية الزايدة

التعامل مع متلازمة الذكر المنرفز

الأعراض اللي ذكرناها فوق ممكن فعلاً تتأثر بطلعات ونزلات هرمون التستوسترون بالجسم. 

لكن كونوا عارفين، صحيح الاختلاف بمستويات التستوسترون طبيعي، بس الانخفاض الكبير بمستوياته ممكن يسبب مشاكل تستمر على المدى الطويل منها: انخفاض الرغبة الجنسية، والاكتئاب.

لهيك إذا كنتوا بتواجهوا الأعراض اللي ذكرناها بشكل مستمر، زوروا الطبيب/ة لتستشيروهمن بالأعراض اللي بتختبروها، ليشخصوها ويعطوكمن حلول إلها.

لكن بشكل عام، نمط الحياة الصحي ممكن يحافظ على توازن مستويات التستوسترون بالجسم ويحسّن من هي الأعراض، متل أنه تحافظوا على وزن صحي، نظام غذائي صحي، تتمرّنوا، وتتجنبوا التدخين وشرب الكحول.

الهرمونات مش محصورة باللي عندهمن مهبل بس!

“معلش، طالعة هرموناتها”، “ماتدققوا، جاييتها”، “شبك منكّدة .. جاييتك؟” 

هاد التعيير اللي بتواجهه الأفراد اللي عندها مهبل مش بس بيأثر عليهمن متل ما البعض بيفكر، كمان بيأثر على صحة أصحاب وصاحبات القضيب اللي بيتم النظر لكلمة “هرمونات” عندهمن وكأنها مسبة. 

الحقيقة أنه الكل عندهمن هرمونات، ومستوى هي الهرمونات بتتغير دايماً، وتغييراتها بتأثر على الصحة النفسية والجسدية لأصحابها، وبتؤثر على مودهمن، عادي، مافي داعي للأفورة ولا للتبنيك

فمش بس في متلازمة الذكر المنفرز، في كمان اكتئاب مابعد الولادة اللي بيصيب الآباء الجدد، وفي الـ Andropause أو الـ Male Menopause واللي لو جينا لنترجمه حرفياً رح نقول (انقطاع الطمث عند الذكور)، لكن بما أنه ما عندهمن طمث من الأساس، فبيسميه البعض سن اليأس، واللي بيرتبط بشكل أساسي بانخفاض مستويات التستوسترون اللي بتحصل عند الذكور مع التقدم بالعمر، والتأثيرات الجسمية والنفسية اللي بتتبعها. 

لكن نتيجة الصورة المصدرة عن الهرمونات على أنها مفهوم أنثوي ومرتبط باللي عندهمن مهبل بس، بتخلي الناس اللي عندهمن قضيب مش قادرين يتعاملوا بشكل صحيح وصحي مع التغيرات الهرمونية اللي بيمروا فيها وتأثيراتها على أجسامهمن، وصحتهمن، وحياتهمن. 

لهيك بنشجع أصحاب وصاحبات القضيب ليولوا اهتمام أكبر لصحتهمن، ولتأثير التغيرات الجسمية اللي بيختبروها على صحتهمن العقلية، وعلى جودة حياتهمن بشكل عام. وأنهمن يحكوا عن التغيرات الهرمونية وتأثيراتها إذا واجهوها، ويسعوا ليحصلوا على المساعدة والدعم. 

فلحظات الشك، والحزن، والغضب هي طبيعية متل ما لحظات الفرح، والأمل، والتفاؤل طبيعية. المهم أنه نكون قادرين نتعامل معها ونفهمها لأنها جزء مننا. 

وهيك ممكن يكون إلك كصاحب/صاحبة قضيب دورة شهرية بمفهوم ما … لكن إذا لقيت قضيبك بينزف، استشير دكتور/ة فوراً .. وماتفكرها دورة شهرية! 

مصادر: 

  • Altibbi, ماهي الدورة الشهرية, Link, Accessed in 18 November, 2024.
  •  Kimberly Holland, 2018, Healthline, Can Men Get Periods?, Link, Accessed in 19 November 2024
  • Brian Krans, 2023, Healthline, What Is Male Menopause, Link, Accessed in 20 November 2024

كتابة: