Skip to content

مش لازم يوجع: 5 وضعيات جنسية لجنس خالي من الألم

مدة القراءة: 7 دقائق

لو الـ “آه” اللي بتقوليها في الجنس ناتجة عن وجع، مش عن متعة، فإجى الوقت اللي تغيريها فيه، وتعرفي أكتر فيه عن علاقة الوضعيات الجنسية بالألم. لأنه الجنس مش لازم يوجع، إلا لو أنتِ بتحبيه يوجع … أما لو الوجع مسببلك عدم ارتياح ومتعة أقل في الجنس، فتعالي نتعرف بهاد المقال عن الوضعيات الجنسية اللي ممكن تزيد هاد الألم، والوضعيات اللي ممكن تخففه!

جاهزين؟

خلّينا بالأول نبدأ بفهم الألم، أنواعه وأسبابه 

الألم اللي ممكن تختبروه خلال الجنس، خاصة الجنس الإدخالي أسبابه مختلفة. وخواصه كمان مختلفة؛ فممكن يكون موجع ومؤلم، وممكن يكون عدم ارتياح بس .. ممكن تحسوا فيه لفترة قصيرة، وممكن يكون مستمر على المدى الطويل .. ممكن تحسوا فيه بأول الإدخال، وممكن تحسوا فيه مع الإدخال العميق. 

والأسباب وراه كمان بتختلف، فممكن يكون بسبب اضطرابات أو حالات صحية متل بطانة الرحم المهاجرة، أو الرحم المقلوب. أو بسبب أدوية معينة، متل بعض مضادات الاكتئاب، وبعض حبوب منع الحمل. ممكن حتى الأسباب تكون نفسية، وممكن ببساطة يكون المهبل مش مبلول كفاية!

لكن شو ما كان السبب الحقيقي ورا الألم، اعرفوا أنه الجنس مش لازم يوجع، إلا لو أنتو بدكن/م ياه يوجع … أما لو كان هاد الوجع بيؤثر سلباً على متعتكن/م في الجنس وبيسببلكن/م عدم ارتياح، فأول شي ممكن تفكروا فيه هو أنه تعيدوا النظر بالوضعيات الجنسية اللي بتجربوها مع الشريك/ة/اء.

الوضعيات الجنسية اللي ممكن تزيد الألم خلال الجنس الإدخالي

١. الوضعية الكلاسيكية أو الMissionary Position:

صحيح أنها من أكتر الوضعيات الجنسية الشائعة، لكن ممكن تفكروا تتجنبوها لو كنتوا بتختبروا ألم خلال الجنس الإدخالي. فبهاي الوضعية بيصير في ضغط على أسفل الضهر ومنطقة الحوض عند أصحاب وصاحبات المهبل المتلقيين للإدخال (لمّا بيكونوا من تحت)، وهاد الشي ممكن يسبب ألم خاصة للأفراد اللي بيعانوا من مشاكل في الحوض، أو من بطانة الرحم المهاجرة. 

لو كنتوا بتحسوا بانزعاج أو ألم لما بتكونوا بهي الوضعية، وحابين تستمروا فيها، جربوا تستخدموا مخدّات (وسائد) تحطوها تحت الورك كوسيلة داعمة بتخفف الألم.

الوضعية الكلاسيكية

٢. الدوجي ستايل (من ورا):

 مع أنها كمان واحدة من أشيع الوضعيات الجنسية، إلّا أنها ممكن تسبب ضغط إضافي على أسفل الضهر، وتسبب وجع خلال الجنس الإدخالي.

بنفس الوقت، الوضعية اللي بيكون فيها الشركاء (من ورا) بتخليهمن قادرين يدفعوا بشدة أكبر وأعمق، وهاد الدفع ممكن يؤدي لألم زيادة، خاصة إذا كان الشريك/ة صاحب أو صاحبة المهبل المتلقيين للإدخال (من تحت) بيعانوا من ألم وقت الإدخال العميق.

٣. وضعية الراكب/ة بالمقلوب أو ال Reverse Cowgirl

مش بس أنتوا قاعدين بتسمعوا هالمصطلحات بالعربي لأول مرة، نحن قاعدين بنخترعهم معاكمن 😂

بهاي الوضعية بيكونوا أصحاب وصاحبات المهبل من فوق، وجسمهمن بعكس الشريك/ة، بالمقلوب يعني، والشريك/ة مستلقي/ة تحت. 

وبالرغم من أنه كتير أفراد بيعتبروا هاي الوضعية هي المفضلة عندهمن، إلا أنها كمان ممكن تسبب وجع عند الأفراد اللي بيعانوا من ألم إدخالي، لأنها كمان بتحط ضغط إضافي على أسفل الضهر والبطن، وممكن تسبب انزعاج خاصة عند الأفراد اللي بيعانوا من التهاب في الحوض، أو بطانة الرحم المهاجرة.

٤. وضعية النسر أو ال Eagle Position

هاي الوضعية بتشبه الوضعية الكلاسيكية (بيكون فيها أصحاب وصاحبات المهبل المتلقيين للإدخال مستلقيين تحت، والشريك/ة من فوق) لكن الفرق أنه رجليهمن بيكونوا على أكتاف الشريك/ة. وهاد اللي بيخلي إمكانية الإدخال بعمق كبيرة كتير بهاي الوضعية، وممكن تسبب ألم عند الأفراد اللي بيعانوا من الوجع بالإدخال العميق.

٥. وضعية الفراشة أو ال Butterfly Position

هاي الوضعية هي واحدة من المفضلات عند الأفراد اللي بيستمتعوا بإدخال عميق. لكنها واحدة من الوضعيات اللي ممكن تفكروا تتجنبوها لو كنتوا بتعانوا من ألم عند الإدخال العميق. 

طيب إذا كل هي الوضعيات رح نتجنبها … شو ضل؟ نبطل نمارس الجنس يعني؟

أكيد لا … متل ما فيه وضعيات بتسبب ألم أو انزعاج، فيه وضعيات تانية بتخفف هاد الألم وبتساعدكمن تمارسوا جنس إدخالي ممتع وخالي من الوجع.

 الوضعيات اللي ممكن تخفف ألم الجنس الإدخالي

١. وضعية المعلقة أو ال Spooning Position

هاي الوضعية ممكن تكون خيار مناسب للأفراد اللي بيعانوا من ألم عند الإدخال العميق. لأنه فيها بيكون الشريك/ة حاضن الشريك/ة المتلقي/ة للإدخال من ورا، فبتسمح بإدخال سطحي نوعاً ما بدون ما يوصل لعمق أكبر.

بنفس الوقت بتحمل هاي الوضعية حميمية خاصة لأنها بتسمح بتقارب بين الشركاء وبتخليهمن قادرين يداعبوا بعض خلال الإدخال. 

٢. الشريك/ة المتلقي/ة من فوق أو ال Cowgirl Position

هاي الوضعية بتخلّي الشركاء المتلقيين للإدخال قادرين يتحكموا بعمق الإدخال اللي بيناسبهمن وبيمتعهمن. وقادرين يتحكموا كمان بشدة وسرعة الإدخال. هاي كلها عوامل بتساعدهمن يستمتعوا بجنس إدخالي غير مؤلم خاصة عند الأفراد اللي بيعانوا من انزعاج مع الإدخال العميق.

٣. وضعية المكواة أو ال Flatiron Position

هاي الوضعية ممكن نعتبرها دوجي ستايل، بس مع شوية تعديلات. فبيكون فيها الشركاء المتلقيين للإدخال مستلقيين على بطنهم، وفي مخدة (وسادة) محطوطة تحت أسفل البطن أو الحوض حتى تقدم الدعم اللي بيخفف الألم. هاي الوضعية بتعطي الشركاء الفرصة ليختبروا الإدخال من زوايا مختلفة ليلاقوا الزاوية اللي بتناسبهمن.

٤. من على الجانب

بتشبه وضعية الملعقة، لكن وجه الشركاء بيكون لبعض. ومتل وضعية الملعقة بتقدم هاي الوضعية حميمية أعلى، وتقارب أكتر بين الشركاء، فبيكونوا قادرين يداعبوا بعض أو يبوسوا بعض خلال الإدخال. وبنفس الوقت الوضعية اللي بتكون فيها أجسامهمن بتخلي الإدخال سطحي نوعاً ما، ومريح أكتر للأفراد اللي بيعانوا من ألم مع الإدخال العميق. 

٥. جنس غير إدخالي

مين قال الجنس لازم يكون إدخالي ليكون ممتع؟ في أشكال كتيرة للجنس بتستحق التجربة، ومتعتها ممكن تكون بتساوي أو بتتفوق حتى على الجنس الإدخالي، متل الجنس الفموي، الإمتاع الذاتي بوجود الشركاء، الجنس اليدوي (مداعبة الأعضاء الجنسية بالإيدين)، مداعبة البظر، واللعب مع الألعاب الجنسية. 

٣ نصايح من ذا سكس توك بالعربي لجنس إدخالي من غير ألم

  1. مش لازم تمارسوا الجنس لو مش حابين: الهدف من ممارسة الجنس هو المتعة لكل اللي بيشاركوا في العملية الجنسية. مش لازم حدا يجبر نفسه على الجنس مشان الطرف التاني، ولا حدا يجبر شركاؤه على شي لو مش حابين يعملوه. واعرفوا أنه لو كنتوا مش حابين أو مستثارين بالدرجة الكافية ففي احتمال كبير أنه يكون الجنس مؤلم بسبب قلة ترطيب المهبل. 
  2. استكشفوا أجسامكمن ومتعتكمن: ترطيب المهبل الكافي مش شرط يجي بالوقت اللي بتكونوا فيه حابين تمارسوا الجنس (بالمود). فكمان بيتأثر بنوع ومدة المداعبة اللي بتصير قبل الجنس الإدخالي. وبما أنه التفضيلات الجنسية للأفراد مختلفة، فبيختلف نوع المداعبة اللي بيفضلوها. لهيك مهم أنكمن تكونوا على تواصل دائم مع أجسامكمن ومتعتكمن، لتعرفوا شو هي المناطق اللي بتحبوا أنها تنلمس، شو شدة اللمسة، وين بتكون البوسة … وهيك 😌
  3. تواصلوا مع شركائكمن بوضوح: نتيجة الاستكشاف اللي حكينا عنه هلأ، رح تصيروا تعرفوا تماماً الشغلات اللي بتحبوها واللي ما بتحبوها. بس شركائكمن -لسوء الحظ- مارح يقدروا يقرأوا عقولكمن، ليعرفوا لوحدهمن شو هي نوع المداعبات اللي بتحبوها. لهيك التواصل الواضح بين الشركاء عن التفضيلات الجنسية مهم كتير وبياخد المتعة الجنسية لمطرح تاني. 

مهم تعرفوا بالنهاية أنه الشغلات اللي ذكرناها فوق مانها قواعد بتنطبق على الكل. فأجسامنا بتختلف، ونوع المتعة اللي بنحبها كمان بيختلف، متل ما بتختلف الطرق اللي بتوصلنا لهاي المتعة. 

لهيك ماتاخدوا هي النصائح على أنها قواعد، استكشفوا بنفسكمن طرق وأساليب ووضعيات مختلفة، لتكتشفوا أجسامكمن ومتعتكمن.

لا تجوا على حالكمن … ولـو كنتوا عم تواجهوا ألم مستمر خلال ممارسة الجنس، ومابتعرفوا سببه،  استشيروا طبيب/ة أو أخصائي/ة حتى تعرفوا سبب الألم، والطريقة الأفضل للتعامل معه.

المصادر:

  • MayoClinic, 2024, Painful intercourse, Link, Accessed 19 November 2024.
  • Emma McGowan, 2023, Thepelvicpeople, 7 Sex Positions to Avoid if You’re Experiencing Painful Sex, Link, Accessed 20 November 2024.
  • Emma McGowan, 2023, Thepelvicpeople, 6 Positions to Try if Sex Hurts, Link, Accessed 20 November 2024.
  • Cleveland Clinic, 2023, What Are the Best Positions To Reduce Endometriosis Pain During Sex?, Link, Accessed 21 November 2024.
  • ACOG, 2020, When Sex Is Painful, Link, Accessed 21 November 2024.

كتابة: