لو هتمارسي الجنس لأول مرة، ممكن تكوني حاسة بخلطة أحاسيس، حماس ممزوج بقلق على سعادة وشوية توتر!
في معظم المجتمعات العربية، مفيش تعليم جنسي إيجابي، والكلام عن الجنس في أغلب الأحوال بيعتبر عيب وممنوع. المنع ده ممكن يخلي ناس كتير تعتمد على مصادر مش موثوق فيها، زي الأفلام الجنسية أو الكلام مع الأصحاب، علشان يحصلوا على معلومات عن أجسادهمن وعلاقاتهمن. بس المعلومات المكتسبة من الأفلام الجنسية بتكون في الأغلب معلومات غلط والمعلومات اللي بنكتسبها من خلال تجارب ناس تانية مش لازم بالضرورة تبقى صح بشكل عام أو تنطبق على كل الناس.
فلو حظك بقى أنك اتولدتي بمهبل في مجتمع عربي، ف أنت كمان غالباً بتسمعي حاجات مرعبة عن الجنس، خصوصاً عن المرة الأولى.
في المقال ده، هنفكك معاكي المعلومات المغلوطة اللي نعرفها عن أول علاقة جنسية، خاصة موضوع الألم ده.
معنى أول مرة
أول مرة بتختلف من ست للتانية وكل ست هي بس اللي تقدر تحدد أول مرة بالنسبة لها هي إيه ……
ممكن أول مرة بالنسبة لك تكون أول مرة تبوسي حد .. أو أول مرة تقلعي قدام حد .. أو أول مرة تمارسي الجنس الفموي .. أو الجنس الشرجي .. أو الجنس المهبلي
كل ست بتعرّف الموضوع بطريقتها وممكن تفضل تمارس حاجة معينة في المرة الأولى، بس في المقال ده، احنا هنركز على الجنس المهبلي والخرافات اللي بتتقال عن ممارسة الجنس المهبلي للمرة الأولى.
توقعات مش حقيقية عن ممارسة الجنس المهبلي لأول مرة:
١- “أول مرة لازم تكون مؤلمة”
٢- “أول مرة دي ممتعة للراجل بس”
٣- “أول مرة لازم ينزل دم”
تعالوا الأول نتكلم عن الألم
الجنس المؤلم ممكن يكون عبارة عن إحساس مزعج وغير مريح في أحسن الأحوال، وممكن يكون عبارة عن إحساس لا يطاق في أسوأ الأحوال. الإحساس بيختلف على حسب سبب الألم، ممكن الألم ييجي في صورة ألم حاد وسريع أو في صورة تشنجات مستمرة.
حسب دراسة عملتها الكلية الأمريكية لأطباء التوليد وأمراض النساء، في حوالي ٧٥% من الستات حسوا بالألم قبل كده أثناء ممارسة الجنس في مرحلة ما في حياتهن. يعني ٣ من كل ٤ ستات. بالنسبة لمعظم الستات اللي حسوا بالألم، الإحساس بالألم بيحصلهمن نادراً أو حصلهن مرة واحدة بس، بس في نسبة قليلة منهن قالوا أنهم حسوا بالألم بصفة مستمرة.
طب دي دراسة في أمريكا، مفيش حاجة قريبة شوية؟
مفيش دراسة عن الإحساس بالألم اثناء ممارسة الجنس اتعملت على الستات في المجتمع العربي بالذات، لان احنا اصلاً مبنحبش نتكلم عن الجنس، عشان يع، إيه القرف ده!!!!
بس احنا مسكتناش وقعدنا نفرك لحد ما لاقينا شوية معلومات ممكن تساعدنا نفهم موضوع الألم ده بالذات للستات في المجتمعات العربية، بس الإجابات مش مفرحة أوي…
يعني مبدأياً الستات في العالم العربي بيعانوا من الألم أثناء ممارسة الجنس بشكل متكرر أكثر مقارنة بالستات في المناطق التانية. ومن العوامل اللي بتسبب الألم أثناء ممارسة الجنس في العالم العربي، عوامل ثقافية ونفسية وجسدية. تعالوا نتكلم في كل نقطة.
العوامل الثقافية:
- في مراجعة عملتها BMC Women’s Health في ٢٠١٨، قالت أن العوامل الثقافية، زي المواقف المحافظة تجاه الجنس، من العوامل اللي بتأثر بشكل كبير على الإحساس بالألم أثناء ممارسة الجنس. فكرة أن الكلام عن الجنس عيب وممنوع في المجتمع المحافظ معناها أن الستات مش هتحب أو مش هتقدر تتكلم عن صحتها الجنسية فالبتالي مش هيكون عندهن وعي كافي عن الجنس ولا عن التعامل مع المشاكل الجنسية زي الإحساس بالألم.
- حسب بيانات أصدرتها هيئة الأمم المتحدة للمرأة في ٢٠٢١، فكرة الوصم والعار المرتبطين بالجنس، خلقت حاجز عند ستات كتير من أنهن يحاولوا يتعالجوا أو يعرفوا ليه بيحسوا بالألم وهن يمارسن الجنس.
العوامل النفسية:
العنف من الشريك من العوامل اللي بتساهم في الإحساس بالألم أثناء ممارسة الجنس عند الستات. في دراسات تانية عملتها BMC Women’sHealth في ٢٠١٩، بتقول أن المنطقة العربية بالذات فيها معدلات عالية من العنف من الشريك، والعنف ده غالباً بيسبب إصابات جسدية ونفسية عند الستات ف بالتالي بيأثر على صحتهن الجنسية وبيحسوا بألم أثناء ممارسة الجنس.
العوامل الجسدية:
تأثير الختان: نفس المراجعة اللي عملتها BMC Women’s Health لقت أن الختان بيساهم بشكل كبير في إحساس الستات في المجتمع العربي بالألم أثناء ممارسة الجنس، لأن الختان ممكن يسبب ألم مزمن وتغيير في تشريح الأعضاء التناسلية ف يؤثر على الوظائف الجنسية والإحساس بالمتعة.
طيب العوامل دي مرتبطة بالستات في المجتمعات العربية، اومال ليه الستات اللي في الدراسة بتاعت امريكا قالوا أنهم بيحسوا بوجع برضه؟
في عوامل تانية بتنطبق على الستات في كل المناطق بصفة عامة، منها عوامل جسدية وعوامل نفسية:
العوامل الجسدية:
١. في بعض الأدوية ممكن تقلل رغبتك في ممارسة الجنس زي مضادات الاكتئاب وحبوب منع الحمل. لو في دوا بيؤثر على رغبتك متوقفيهوش من نفسك واسألي طبيبك/ طبيبتك لو في بديل او في طريقة تخففي بيها تأثير الدوا.
٢. بعض الأمراض النسائية زي أكياس المبايض أو بطانة الرحم المهاجرة.
٣. انقطاع الطمث – ممكن انخفاض مستويات هرمون الإستروجين في فترة انقطاع الطمث أو ما قبل انقطاع الطمث تسبب جفاف في المهبل فـ تحسي بوجع.
العوامل النفسية:
١. مشاكل في العلاقة بينك وبين الشريك/ة – المشاكل اللي ما بينكم ممكن تأثر على رغبتك وقدرتك على الاستمتاع.
٢. عدم وجود ترطيب في المهبل بسبب عدم وجود مداعبات كافية.
غالباً الستات مبيوصلوش للنشوة من الجنس المهبلي نفسه، أقل من ١ من كل ٥ ستات بيوصلوا للنشوة من الجنس المهبلي بس. عشان كده المداعبات، زي البوس، واللمس، واللحس، وكل الحاجات اللي ممكن تتعمل قبل ووقت الإدخال مهمة عشان تخليكي في الموود وتحسسك بالإثارة فـ يحصل ترطيب في المهبل. لو مفيش ترطيب هتحسي بوجع.
طب إيه ده، يعني الاحساس بالألم شائع وليه أسباب كتير كمان؟ هو مش المفروض الجنس يكون ممتع؟
للأسف هو شائع فعلاً، وده اللي خلانا عايزين نتكلم في الموضوع. عشان لما نفهمه كويس ممكن ده يساعدنا وعشان تعرفي أنك مش لوحدك لو حسيتي أو خايفة أنك تحسي بالألم.
طب إيه أفقد الأمل؟ لأ خالص، مش معنى أن الألم حاجة شائعة أنك تقبلي بيه كأمر واقع. مهم أنك تفكري إزاي تخلي التجربة ممتعة ومريحة ومتسكتيش على الألم أو تمارسي الجنس تقضية واجب عشان شريكك يستمتع، وده ينقلنا للخرافة التانية .. “أول مرة دي ممتعة للراجل بس.”
تعالوا نتكلم عن المتعة
ممارسة الجنس هدفها مش متعة الراجل وبس. انتي كمان من حقك تستمتعي سواء كنتي بتمارسي الجنس للمرة الأولى أو المليون .. بس إيه الحاجات اللي ممكن تعمليها عشان تكوني مرتاحة ومستمتعة؟
١. أنك تكوني جاهزة نفسياً وجسدياً وتكوني فعلاً عايزة تدخلي في تجربة جنسية من غير ما تبقي حاسة بأي ضغط. مفيش داعي للاستعجال، لو حاسة أنك مش مستعدة أو محتاجة تاخدي الموضوع واحدة واحدة مع الشريك/ة، خدي وقتك واسمعي لجسمك.
٢. أن يكون في تراضي متبادل بينك وبين الشريك/ة. لازم الموافقة على ممارسة الجنس تكون واضحة وصريحة وتكونوا أنتوا الاتنين متحمسين ليها.
٣. أنك تكوني مع شريك/ة بيفهموا احتياجاتك وبيتكلموا معاكي عنها وعن احتياجاتهم براحة وحرية.
٤. أن المكان اللي هتمارسوا الجنس فيه يكون مكان آمن ومريح. للأسف لو أنت عايشة في مجتمع متحفظ، صعب أنك تلاقي مكان آمن عشان تمارسي فيه الجنس، بس افتكري أن دي حاجة مهمة عشان تقدري تسترخي وتستمتعي وكمان عشان متعرضيش نفسك لأي خطر.
٥. أن يكون في مداعبات وترطيب كافي للمهبل، عشان تقدري تستمتعي بالعلاقة من غير ألم.
٦. أنك تختاري وسيلة وقاية مناسبة عشان متبقيش قلقانة من الحمل غير مرغوب فيه أو الأمراض/الالتهابات الجنسية.
٧. أنك تاخدي بالك أنت والشريك/ة من صحتكم الجنسية عن طريق أنكم تعملوا تحاليل، عشان تتأكدوا أن محدش عنده التهابات أو أمراض منقولة جنسياً، أو لو في التهابات/أمراض تعرفوا تتعاملوا معاها بشكل صحيح.
٨. أنك تبصي للجنس على أنه تجربة إيجابية عاوزة تنبسطي بيها وتستكشفي من خلالها أنت بتحبي إيه.
طب والنزيف؟ أنا سمعت أن أنا أول مرة لازم أنزف..
يلا نتكلم عن العذرية والنزيف أثناء ممارسة الجنس للمرة الأولى
نرجع للعقد اللي اتربينا عليها كأصحاب وصاحبات مهبل في مجتمعات عربية! معظم أصحاب وصاحبات المهبل في المجتمعات دي بيعانوا من الضغط عشان يحافظوا على عذريتهن و”ميتفتحوش” لحد الجواز، وده بيخلي كتير منهن يمارس الجنس الشرجي أو الفموي عشان “ميفقدوش عذريتهن.”
خلونا الأول نوضح إيه هو غشاء البكارة، ده عبارة عن قطعة رقيقة من الجلد بتغطي فتحة المهبل جزئياً، وبيكون فيها ثقب أو ثقوب كتيرة عشان تسمح لدم الدورة الشهرية انه يخرج – يعني الغشاء مبيقفلش فتحة المهبل بشكل كامل.
بس ده مش معناه أن ممكن أي حد يعرف لو أنت مارستي الجنس ولا لأ بفحص غشاء البكارة. في ٢٠٠٤، في دراسة اتعملت على ٣٦ مراهقة حامل، عشان يعرفوا لو ممكن يتم تحديد لو مارسوا الجنس ولا لأ عن طريق فحص غشاء البكارة، بس الطاقم الطبي معرفش يوصل لنتائج نهائية عن لو حصل إدخال ولا لأ إلا في حالتين بس من ال٣٦. وفي دراسة تانية اتعملت في ٢٠٠٤ لقت أن ٥٢% من البنات المراهقات الناشطات جنسياً اللي اتعملت عليهن الدراسة، مكنش عندهن أي تغييرات في أنسجة غشاء البكارة بسبب ممارسة الجنس. فـ فكرة فحص غشاء البكارة عشان نتأكد لو أصحاب وصاحبات المهبل مارسوا الجنس ولا لأ، هي ببساطة فكرة مش دقيقة وملهاش أي قيمة علمية. في الحقيقة أن مفيش أي طريقة أن حد يعرف سواء كنتي مارستي الجنس ولا لأ إلا لو أنت قلت بنفسك أنك مارستي الجنس، أو شريكك أو شريكتك قالوا ده.
كمان مش كل الستات وأصحاب المهبل بيكون عندهن غشاء، في ستات مولودة من غيره. وحتى اللي عندهن مش شرط ينزفوا في أول مرة يمارسوا الجنس المهبلي. لو حصل والغشاء اتقطع، في بعض الستات بتحس بألم وفي ستات مبيحسوش بحاجة، وممكن يكون في نزيف، بس غالباً بيكون بسيط لدرجة أنك ممكن متلاحظيش الفرق بينه وبين الإفرازات المهبلية. في طبيبة توليد عملت استطلاع رأي لـ ٤١ من زميلاتها وسألتهن لو حصلهن نزيف في المرة الأولى اللي مارسوا فيها الجنس، ٦٣% منهن قالوا أنهن محصلهمش نزيف.
في النهاية، احنا شايفين ان الكلام عن المرة الأولى مهم، لأننا كستات في مجتمعات عربية محافظة ممكن منقدرش نتكلم عن توقعاتنا عنها ونشارك حماسنا أو مخاوفنا منها ونسأل أسئلة عنها بأريحية مع أنها ممكن تكون حدث مهم لكتير مننا، فـ حبينا نفكك معاكي بعض من الخرافات عن المرة الأولى ونقولك على حاجات ممكن تساعدك على الإحساس بالمتعة.
ودي قائمة بمصادر ومقالات تانية ممكن تعرفو منها معلومات أكتر عن الموضوع
- What to do about painful sex?
https://flo.health/menstrual-cycle/sex/sexual-health/painful-sex-symptoms-causes-and-treatment
2. When Sex is Painful
https://www.acog.org/womens-health/faqs/When-Sex-Is-Painful?utm_source=redirect&utm_medium=web&utm_campaign=otn
3. Predictors of female sexual dysfunction:
https://bmcwomenshealth.biomedcentral.com/articles/10.1186/s12905-018-0602-4
4. Sexual and reproductive health in the Arab region
https://arabstates.unwomen.org/sites/default/files/Field%20Office%20Arab%20States/Attachments/2021/07/SRHR-Policy%20Paper-EN.pdf
5. Prevalence of intimate partner violence against women in the Arab world:
https://bmcinthealthhumrights.biomedcentral.com/articles/10.1186/s12914-019-0215-5
6. How can I orgasm more often during sex?
Ask the Gynecologist: How can I orgasm more often during sex?
7. What to know about the hymen?
https://www.webmd.com/women/what-to-know-about-the-hymen
8. Hymen
https://my.clevelandclinic.org/health/body/22718-hymen
9.غشاء البكارة: كيف ننهي أسطورة العذرية التي استمرت طوال قرون؟
https://www.bbc.com/arabic/world-61396431
