Skip to content

؟Squirting يعني ايه

 

في كتير مننا ممكن يكون سمع عن التدفق أو شافوا في الأفلام الإباحية بس ميعرفش هو ايه بالظبط. 

كمان العلماء نفسهم اختلفوا على تجربة التدفق سواء عن هي بتحصل بجد ولا لأ، ولو سائل التدفق بيتكون من بول بس ولا حاجات تانية، ولو كل أصحاب وصاحبات المهبل يقدروا يمروا بيه.

لسه برضه مش معروف كمية سائل التدفق أو الأشخاص اللي بيمروا بالتجربة بيحصلهم كده كل قد ايه، وصعب التحديد بالظبط، لأن الأبحاث بتعتمد على إن الأشخاص هم اللي يتكلموا عن تجربتهم بنفسهم، وممكن أصلاً ميبقاش قصدهم نفس الحاجة لما يتكلموا عن التجربة، أو ممكن يحصلهم تدفق وميحسوش. 

كمان لسه مش معروف ليه التدفق بيحصل بالظبط. في نظرية بتقول إن سبب التدفق هو الطريقة اللي أجسامنا بتتكون بيها في الرحم وإن الأعضاء الجنسية متشابهة عند الذكور والإناث في حاجات كتير، فا ممكن يكون أصحاب وصاحبات المهبل هم كمان بيخرج منهم سوائل أثناء أو بعد ممارسة الجنس بس عن طريق غدد شبه البروستاتا عند أصحاب وصاحبات القضيب، وعشان كده العلماء دول شايفين إن سائل التدفق مش مجرد بول وبس.

ساعات بيتقال على التدفق مسمى القذف الأنثوي بس في الحقيقة هم حاجتين غير بعض. في الحالتين في سائل بيخرج من المثانة وقت ممارسة الجنس، بس في حالة القذف الأنثوي، ممكن يحصل تدفق بسيط لسائل لونه أبيض بس مبيكنش بنفس كمية أو اندفاع سائل التدفق. وممكن يحصل تدفق وقذف في نفس الوقت.

إحنا شايفين إن الكلام عن السوائل الجنسية لأصحاب وصاحبات المهبل مهم عشان نطبع الموضوع ونخلق حوار عنه وكمان عشان متقلقيش لو مقدرتيش تمري بالتجربة أو مريتي بيها ومفهمتيش ايه اللي حصل.

لو حابة تلعبي وتستكشفي عشان تجربي احساس التدفق دي حاجة في حد ذاتها ممتعة وهتساعدك تعرفي جسمك أكتر سواء مريتي بالتجربة أو لأ. وافتكري إن التدفق هي حاجة واحدة من حاجات كتير أوي ممكن تعمليها عشان تستمتعي بجسمك أو تساعدي شريكك أو شريكتك على الإحساس بالمتعة.