“بحس كأنك ما عاد بدك تعمل سكس معي متل قبل”
“دايماً أنا اللي ببادرتجاهه هو ما عاد بادر”
“وقت اللي انا بكون بالمود هي ما بيكون بدها”
إذا بتحس، بتفكر، أو حتى بتشارك هي الجمل أو غيرها مع القريبين منك، وإذا عم تشوف في فرق بين رغبتك الجنسية ورغبة شريكك/تك سواء أقل/أكتر فحابين نقلك أنك مانك لحالك، وأنه طبيعي جداً تحس هيك.
ليش؟ لأنه ببساطة كل حدا فيننا عنده هويته الجنسية الفريدة واللي ما بتشبه هوية أي حدا تاني، من ضمنها الرغبة بالجنس؛ أيمت، ووين، وأديش.
لهيك من الطبيعي يكون في فرق بالرغبة الجنسية بينك وبين الشريك، ومفهوم أنه هالشي بيسبب أحياناً عدم ارتياح بالعلاقة بالنسبة لحدا فيكن، لأننا كأشخاص منربط تواتر العلاقة الجنسية بعدة شغلات، فبالنسبة للبعض ممكن يكون مؤشر لقوة العلاقة أو حتى إمكانية استمرارها.
ضروري نعرف أنه الرغبة بالجنس ما بس بتختلف باختلاف الأشخاص، كمان بتختلف بالنسبة للشخص نفسه باختلاف مراحل حياته، حسب المود، حسب نمط حياته وكتير شغلات تانية، وهي بدها بوست تفصيلي لحاله.
بس المهم هو السؤال: كيف أتصرف إذا شريكي عنده رغبة جنسية أقل مني؟ أو أكتر مني؟
ببساطة، احكي مع الشريك! بما أنه اتفقنا أنه مافي مسطرة نقيس عليها، فالحل الوحيد لنكون مرتاحين ونضمن ارتياح الآخر هو أنه نتواصل بشكل فعّال معهن. احكوا عن رغباتكن وعبّروا عنها، تواصلوا مع الشركاء عن الشي اللي بريحكن، واسمعوا منهن كمان.
وتذكروا أنه ممكن الحكي بالموضوع ممكن يكون حساس للبعض، لهيك احرصوا على وجود مساحة آمنة بالعلاقة هدفها هو راحتكن، بتعبّروا فيها عن رغباتكن لتوصلوا لحلول ترضيكن وتأمنلكن حياة جنسية ممتعة!
وتذكروا أنه رغباتنا الجنسية هي مسؤوليتنا الفردية، ومشاركتها مع أفراد تانية هي أمر ممتمع لكن ماينقلش مسؤولية متعتنا للأشخاص التانية. وأنتو، احكولنا كيف بتتعاملوا مع اختلاف الرغبات الجنسية بينكن وبين شركاؤكن؟
