مقدمة
لو كنتِ حالياً بتمري بمرحلة المراهقة والبلوغ أو قربتِ منها وحاسة بشوية خوف وتوتر، فا اتطمني، ده شيء طبيعي جداً بسبب التغيرات الجسدية والنفسية اللي بتحصل في المرحلة دي، واللي واحدة من أهمها هي الدورة الشهرية أو الحيض أو “البَرْيَدَة” زي ما صديقتنا ماريا في خطيرة سمّتها في الفيديو بتاعها عن الدورة الشهرية.
التوتر ده ممكن يزيد لما تلاقي والدتك بتشرحلك عن موضوع البيريود (Period) بطريقة مريبة وغريبة شوية وكأنها مجبرة، وأحياناً بتهرب من أسئلتك من غير ماتجاوبك بشكل واضح عليها.
وممكن كمان تسمعي عن الدورة الشهرية من صاحباتك والناس اللي حواليكي وده يخلي عندك أسئلة أكتر عاوزة تعرفي إجابتها.
ويمكن تكون جاتلك أول دورة شهرية فعلاً ومحتارة إيه هو الطبيعي وإيه اللي مش طبيعي.
لكن في كل الأحوال ماتقلقيش، كملي قراءة المقال ده وهتلاقي فيه إجابة على كل أسئلتك!
يلا بينا نبدأ!
إيه هي الدورة الشهرية أصلاً؟
الدورة الشهرية أو دورة الحيض هي عبارة عن سلسلة من التغييرات بيمر بيها الجسم بشكل شهري هدفها هو إعداد الجسم للحمل عند الأفراد اللي عندهن أعضاء تناسلية أنثوية.
اللي بيحصل بالظبط إن في عضو في أجسام الستات اسمه المبيض وهو عبارة عن غدة تناسلية شكلها بيضوي، وحجمها حوالي الـ4 سنتيمترات، الستات عادةً بيكون عندهن مبيضين مكانهم على جانبي الرحم، ومثبتين بـأربطة على الرحم، ووظيفتهم إنهم يتناوبوا في إطلاق البويضات/ كل شهر بويضة، مرة من المبيض ده ومرة من المبيض التاني في أغلب الحالات، وبيبعتوها لـلرحم.
طب إيه هو الرحم؟
اصبري وأنا هحكيلك …
الرحم ياستي موجود في منطقة الحوض عند الستات، وشكله بيشبه الكمثرى (الأجاصة)، وليه وظائف مختلفة في الجسم، منها الحمل، لأن الجنين بينمو جواه، وله وظيفة كمان في حصول الحيض.
فلما بتوصل البنت لمرحلة البلوغ بتبدأ البويضات تنضج، وكل شهر بيحرر واحد من المبيضين بويضة (اللي نضجت) وبيفرز معاها كمان هرمونات (إستروجين وبروجسترون) مسؤولة عن تهيئة الرحم لاستقبال البويضة دي؛ عشان الرحم بيكون فاكر نفسه بيتهيأ لحدوث الحمل؛ واللي بيحصل فعلاً لو كانت البويضة دي اتخصبت بـ نطفة واللي بتتحول بعدها إلى جنين. أما لو ماحصلش الكلام ده، فالبيضة غير المتخصبة ما بتزلقش في جدار الرحم، وبيدفعها الرحم هي والأنسجة اللي هيأها والدم عبر المهبل، وده هو اللي بيشكّل دم الحيض، أو دم الدورة.
امتى ممكن تجيلي أول دورة شهرية؟
بشكل عام .. السن الوسطي اللي بتيجي الدورة فيه أول مرة هو حوالي الـ12 سنة، لكنها ممكن تيجي بشكل عام ما بين سن الـ8 والـ17 سنة مع اختلاف الأفراد.
عادةً بتبدأ الدورة الشهرية بعد سنتين تقريباً من ما يبدأ صدرك ينمو، وفي علامات تانية كمان بتدل على اقتراب أول دورة ليكي واللي هي علامات البلوغ زي نمو الشعر في منطقة تحت الباط، وعلى العانة.
طب كل كام يوم هتجيلي الدورة؟ وهتفضل كام يوم؟
أول سنتين لـ 5 سنين من أول دورة شهرية بتجيلك، ممكن الدورة ماتكونش منتظمة، وده طبيعي لأن جسمك لسا بيتعود على المرحلة الجديدة دي.
بعدها بقى ولما تستقر بتبدأ تجيلك كل 23 لـ35 يوم، ولما بتيجي بتفضل مدة يومين لـ7 أيام.
وده هو الحد الأنى لعدد الدورات الشهرية الطبيعية اللي بتجيلك كل سنة بحسب مقال عن الدورة الشهرية مكتوب من Children Wisconsin.
في السنة الأولى (اللي بدأت الدورة تجيلك فيها) طبيعي إنه يجيلك 4 دورات شهرية فما فوق.
في السنة التانية، الحد الأدنى الطبيعي لعدد الدورات الشهرية هو 6 دورات.
أما في السنوات بين 3 لـ5 من أول دورة شهرية، فالعدد الطبيعي الأدنى للدورات الشهرية خلال السنة هو 8.
أما بعدها فبيبقى الحد الطبيعي الأدنى هو 10 دورات حيض خلال السنة.
هو ليه ستات كتيرة مابتحبش الدورة أوي أو بتشتكي منها؟
عشان الدورة الشهرية مابتجيش لوحدها، وإنما بييجي معاها أعراض كتيرة وبتختلف من ست لتانية.
الأعراض الشائعة اللي بتختبرها ستات كتير خلال الدورة الشهرية هي:
التقلّصات
ودي بيرجع سببها إلى أنه مع إطلاق بويضة من المبيض بتطلق بطانة الرحم مواد تعرف بـ البروستاجلاندينات. واللي بتسبب انقباض (تقلّص) في عضلات الرحم، واللي بيسبب الشعور بالتقلصات دي … واللي غالباً بتحصل في أول يومين من الدورة على شكل ألم في منطقة أسفل البطن أو أسفل الضهر.
لكن في طرق كتيرة لتخفيف ألم التقلصات دي لما تحصل، زي حمام ساخن، أو كيس مياه سخنة، أو مضادات الالتهاب غير الستيروئيدية (NSAIDs) زي السيتامول، البروفين، والنابروكسين، واللي وظيفتها أنه توقف إنتاج البروستاجلاندينات وبالتالي بتوقف معاها التقلصات.
لكن اعرفي أن التقلصات دي والألم اللي بيسببها مش هيمنعك من أنك تروحي المدرسة، أو أنك تخرجي للشغل. صحيح أنه شدتها بتختلف مابين ست وتانية، لكن لو لاحظت أنها شديدة لدرجة إنها مابتخليكيش قادرة تقومي بالنشاطات الطبيعية اللي بتقومي بيها عادة، أو أنها بتعطّل يومك بشكل كامل، أو بتخليك محتاجة تاخدي يوم أجازة كل شهر بسببها، فاستشيري طبيبك أو طبيبتك المختصة عشان تسمعي نصيحتهمن بشأن حالتك.
النزيف الغزير
النزيف أول ما تبدأ تيجي الدورة ممكن يكون أغزر شوية، وممكن كمان ده يحصل (تلاقي أنه بقى أغزر) بعد سنتين تلاتة من أول دورة.
مثلاً، ممكن في أول دورتين شهريات أو تلاتة يفضل النزيف لفترة أطول من فيفضل (8-10) أيام، وده طبيعي عشان جسمك لسا بيتعود.
ممكن في حالات تانية تلاقي النزيف بتاع الدورة زاد في فترة معينة حتى لو جاتلك الدورة من أكتر من سنتين، في الحالات دي لو استمر الموضوع ده أكتر من 4-6 شهور ممكن تتعرضي لحالات فقر الدم.
مهم في الفترات دي ولما تجيلك الدورة بشكل عام إنك تاكلي أطعمة فيها حديد زي اللحوم الحمرا، المأكولات البحرية والخضراوات الورقية. واستشيري طبيبتك المختصة بشأن النزيف الغزير لو لاحظتيه بشكل مستمر عشان تطمني أكتر.
متلازمة ما قبل الحيض (PMS)
من اسمها؛ بتحصل قبل الحيض بكام يوم، نتيجة التغيرات في مستويات الهرمونات في الجسم واللي ممكن تسبب أعراض جسدية وعاطفية.
المتلازمة دي أعراضها كتيرة لكن أكترها شيوعاً هو:
- الشعور بانتفاخ في البطن (كأنها مليانة غازات ومابتطلعش)
- ألم في منطقة الصدر
- تقلبات في الموود (المزاج)
- الصداع
الأعراض دي كلها وغيرها بتكون غلسة شوية ومش ألطف حاجة، لكن مهم تعرفي إن الوجع اللي بيرافق الدورة الشهرية أو بييجي قبلها مش من المفروض أنه يمنعك تقومي بنشاطاتك اليومية، أو يعطّلك عن شغلك ليوم كامل.
آه ممكن تلاقي طاقتك أقل في الأيام دي، وممكن تلاقي نفسك محتاجة تستريحي شوية في وقت معين من اليوم، لكن لو لاحظت أن الألم ده بيخليك محتاجة ماتروحيش المدرسة من شدته وده بيحصل بشكل متكرر كل شهر فساعتها استشيري طبيبك أو طبيبتك عشان تعرفي سبب الألم الزايد.
إيه المنتجات اللي ممكن أستعملها للدورة الشهرية؟
في عدة خيارات للتعامل مع دم الحيض، وأنت بتختاري الأفضل منها بحسب تجربتك.
الفوط الصحية (Pads): كتير من البنات بيستخدموا الفوط الصحية أول ما يبدأوا يتعاملوا مع دم الحيض لأن التعامل معاها أسهل شوية من المنتجات التانية. الفوط دي بتكون مصنوعة من القطن وبتيجي بأحجام مختلفة وأشكال مختلفة. وفيها لاصق عشان تلزق بالكيلوت (الملابس الداخلية). وظيفتها أنه تمتص دم الحيض اللي بينزل من المهبل، وهتحتاجي تغيريها كل ما تتملي، ده غالباً بيكون بعد 3-4 ساعات، وطبعاً بيختلف من ست لتانية، ومن يوم لتاني (عشان غالباً النزيف بيكون أغزر في الأيام الأولى من الدورة).
السدادة القطنية (Tampon): هي عبارة عن سدادة قطنية شكلها أنبوبي، بتحطيها في المهبل وبتمتص دم الحيض. في آخر السدادة بيكون في خيط عشان تسحبيها منه لما تكوني عايزة تخرجيها.
لكن مهم إنك ماتسيبيش السدادة القطنية في المهبل أكتر من 8 ساعات عشان ده ممكن يزيد خطر إصابتك بـ متلازمة الصدمة السامة. فلو حسيتي إنك عييتي (مرضتي) فجأة أو جاتلك أعراض زي الحمى، صداع، غثيان وقئ بشكل مفاجئ بعد استخدامك للسدادة القطنية، تواصلي مع الدكتورة عشان تساعدك وتوجهك للإجراءات اللازمة.
أكواب الدورة الشهرية (Menstrual cups): دي بتكون على شكل الكأس ومصنوعة من السيليكون وكمان بتحطيها داخل مهبلك. لكن الأكواب دي ما بتمتصش دم الحيض زي الفوط والسدادات إنما بتجمّعه.
والحلو فيها إنك تقدري تغسليها وتستخدميها مرات تانية، على عكس الفوط والسدادات اللي بتُستخدَم لمرة واحدة بس.
أما دلوقتي فخدي مننا الست نصايح دول عن الدورة:
- لا داعي للهلع: لو لسه الدورة هتجيلك قريب، أو لو جاتلك بالفعل وحاسة بالارتباك، بالخوف أو حتى بالخجل، فا اتطمني في بنات كتير زيك بتحس بكده بالرغم من أنه مفيش داعي لا للخوف ولا للحرج خااالص!
علشان غالبية الأفراد اللي عندهن جهاز تناسلي أنثوي بتجيلهن الدورة، وبيعيشوا حياتهن طبيعي وزي الفل، وعشان هي كمان سبب تواجدنا واستمرارنا كبشر على الأرض. فعملياً، احنا من غيرها ولا حاجة!
فافتكري ده لما تكوني مكسوفة من الدورة، واعرفي أنها بتحصل بشكل طبيعي جداً وكجزء أساسي من تطور جسمك ونموك، وده في حد ذاته شيء يستحق الاحتفال!
- خلّي التكنولوجيا تسهّل عليكي الدورة: دلوقتي بقى في تطبيقات (Applications) كتيرة بتسهّل عليكي تتبّع الدورة الشهرية وبتفكّرك بإنها هتجيلك كمان يومين، وممكن تساعدك جداً خاصة لمّا يكون عندك ألف حاجة فوق دماغك وناسية امتى جاتلك الدورة آخر مرة عشان تحسبي وتعرفي امتى هتجيلك. وده مهم برضو عشان تكوني عاملة حسابك ومهيئة بالمنتجات اللي بتستعمليها عادةً، وعشان ما تفاجئكيش في مكان أو وقت غير متوقع.
- أول مرة: لو لسا مامريتيش بأول دورة حيض، وحصلتلك وأنت في مكان زي المدرسة مثلاً، فا اتطمني، زي ما قلنا دي مش حاجة محرجة ولا بتخوف. اتكلمي مع مدرستك أو حد من المسؤولين، احكيلهمن واطلبي منهمن فوطة صحية عشان تستخدميها.
- اهتمي بصحتك خلال الدورة: غيّري المنتج اللي بتستخدميه للتعامل مع دم الحيض بشكل مستمر. التواتر ده بيعتمد على نوع المنتج اللي بتستخدميه، وعلى غزارة دم الحيض عندك، لكن أول ما تلاقي مثلاً إن الفوطة الصحية اتملت فهي محتاجة تغيير وده بيحصل غالباً زي ما قلنا كل 3-4 ساعات وسطياً، أما بالنسبة للسدادة القطنية فمهم زي ماقلنا إنك ماتخليهاش أكتر من 8 ساعات علشان ده ممكن يكون له مضاعفات خطيرة على جسمك بسبب الصدمة السمية.
حاولي كمان تحصلي على ساعات نوم كافية خلال الدورة الشهرية، وإنك تحافظي على نظام غذائي صحي وغني بالحديد والفيتامينات وتشربي مياه كافية.
- البسي ملابس داخلية قطنية مريحة وفضفاضة: اللبس الضيق ممكن يحبس الرطوبة والحرارة وده بيشكل بيئة مناسبة لنمو الجراثيم، وممكن يسببلك عدوى أو التهاب خاصةً في فصل الصيف لما تكون الدنيا حر وبنعرّق كتير.
عشان كده اللبس القطن والفضفاض هو صديقك المفضل خاصةً خلال وقت الحيض.
- اتكلمي مع الناس اللي بتثقي فيهمن والقريبين منك عن مخاوفك وأفكارك تجاه الدورة الشهرية، لما بتتواصلي بوضوح عن مشاعرك وأفكارك، ده بيخليهم أكتر وضوحاً ليكي، مش بس كده، لما بتسمعي تجارب أفراد تانية حواليكِ وقصصهن مع الحيض ده ممكن يحسسك بالأمان أكتر وأنك مش لوحدك.
خاتمة
مشاعرك تجاه الدورة الشهرية أو دورة الحيض ممكن تكون متلخبطة، وممكن كمان تمر بمنعطفات وده طبيعي، أولاً لأن جسمك بيمر بمرحلة جديدة، وثانياً بسبب الوصمة اللي المجتمعات اللي بتتكلم بالعربي بالأخص بتحطها حول الدورة وحول كل اللي بيتعلق بيها.
ومع الأسف الثقافة المنتشرة حول الدورة مش بس بتأثر عليكي نفسياً، وممكن تحسسك بالإحراج أو التوتر كل ما يجيلك الحيض، لأ دي كمان ممكن تعرّضك لمضاعفات جسدية وصحية بسبب المعلومات الخاطئة المنتشرة حول الدورة الشهرية زي المضاعفات والوجع الشديد اللي ممكن نفتكره طبيعي بسبب قلة المعرفة العلمية والصحيحة بإيه هو الطبيعي وإيه اللي مش طبيعي.
علشان كده خلّيك دايماً بتبحثي عن المعلومة الصح والعلمية، ودوّري دايماً ورا المعلومات المنتشرة اللي بتسمعيها من الناس حواليك وتأكدي من مدى صحتها، عشان في النهاية أنتِ المسؤولة عن صحتك مش بس جسدياً لكن نفسياً كمان.
