our story
كان يا مكان في مكان افتراضي اسمه الفيس بوك بدأت قصتنا، مجموعة ستات نسويات كويريات عمرهن ما أتقابلوا، كان نفسى اقولكم ان الموضوع كان وردى و اننا لقينا بعض بسهولة في اقتراحات الفيس بوك لاشخاص قد تعرفهم .. بس لا ده مش الحقيقة قصتنا كانت زى حيواتنا اليومية يوم لطيف و يوم في منتهى البواخة، عدى علينا ستات كتير ساعدونا و دعمونا و عمرنا ما كنا هنوصل ان المبادرة تبقى مؤسسه من غير دعمهن و وقتهن وجهدهن.
فاطمة إبراهيم المؤسسة
هحاول اكتب كل الناس واجيب سيرتهن واشكرهن، بس السكة طويلة فهنحتاج كوباية شاي وشوية تركيز تحديدا يوم 30 يناير 2018 خليكم فاكرين اليوم ده، عشان كل الاحداث هتحصل من بعده ولو مش مركزين في التفاصيل (مش هيحصل اى حاجة هنحكى تانى من الأول)
" مش مصدقة كمية الفتى والمعلومات الغلط اللي بقراها كل يوم، والتعليقات قد ايه مستفزة وبترسخ مبادي ذكورية واقصائية، انا مش عارفة فين المكان اللي يسمح للستات تتكلم وتلاقى حد يرد عليها باحترام وبمعلومات موثوق فيها من غير ما يقلل من خبرتها او يحطها في قوالب؟!! الموضوع طول و مسخ و بقى في منتهى البواخة ، اظن ان لازم يكون في فراغ بديل، مساحة أمان للكلام عن الجنس والجنسانية لكل الستات العربيات بتنوعهن"
ليل بارد جدا في بلاد المهجر
