الـgrooming أو استمالة الأطفال هو لما شخص بالغ يبني علاقة مع طفل أو مراهق بهدف استغلاله جنسيًا. المشكلة إنه بيحصل بأساليب بتشبه الرعاية والاهتمام، وده بيخلي اكتشافه صعب.
مثلاً، في حاجات ممكن تبان طبيعية لكنها بتُستخدم لاستدراج الأطفال وتحضيرهم للتحرش والاستغلال، زي:
اللعب، خصوصاً اللي فيه تلامس جسدي
تمضية وقت طويل مع الطفل وتحسيسه إنه مميز عن غيره
تقديم الهدايا والاهتمام ليه علشان يوثق في الشخص ويحبه
خطورة الـ grooming بتكون في إن الشخص المُستغل بيستخدم التلاعب النفسي عشان يخلي الطفل يتعلق بيه ويحبه، وبعدين يحس إنه مسؤول عن اللي بيحصله لأنه “وافق” على الاهتمام ده.
و أحياناً التانية، الطفل حتى ما بيشوفش نفسه ضحية، لكنه بيكون فاكر إن دي علاقة طبيعية، ومش لازم يخرج منها.
إزاي تعرف لو طفلك بيتعرض للاستمالة والاعتداء ؟
خد بالك لو لاحظت إن طفلك:
- لما يكون في تغييرات مفاجئة في سلوك الطفل أونلاين (بيقضي وقت أكتر أو أقل).
- بيغيب بشكل متكرر عن البيت أو المدرسة.
- بيخبي تفاصيل يومه وما بيحبش يحكي عن اللي بيحصله.
- بيكون معاه هدايا أو فلوس مش عارفين جابها منين.
- عنده صداقة أو علاقة مع شخص أكبر منه بكتير.
- بيستخدم مصطلحات جنسية مش متوقعة لسنه.
- عنده تغيرات نفسية أو سلوكية زي الاكتئاب أو العزلة عن الناس.
مهم تفتكروا أن التواصل والثقة هم أساس للعلاقة الصحية مع أطفالكو، وهم اللي بيخلوهم يحسوا بالأمان معاكو، فيقدروا يشاركوا أفكارهم ومخاوفهم ومشاعرهم، لأنهم عارفين أنكو مش حتحكموا عليهم.
المعلومات دي ممكن تحمي أطفال كتيرة من التحرش، شاركوها عندكو علشان نوسع الدايرة الآمنة للأطفال، ونفكّر الأهل ياخدوا بالهم أكتر من أطفالهم ومحيطهم.
ملحوظة : الـ grooming ممكن يحصل كمان مع أفراد بالغة، من أشخاص أكبر منها في السن أو عندهم سلطة عليهم … بس هنتكلم عن ده في بوست تاني
« Back to Glossary Index