ساعات كتير لما بنسمع عن الصحة الجنسية، بيبقى الجنس المثلي عند أصحاب وصاحبات المهبل برا الحوار. وكأنه الجنس في الحالات دي، بيبقى محمي كده من نفسه.
لكن الحقيقة إن ده مش حقيقي خالص. ولو كنتوا فاكرين إنه الجنس المثلي عند أصحاب وصاحبات المهبل آمن ومافيش داعي إننا نقلق بسببه أو نحمي نفسنا خلاله، يبقى محتاجين تعيدوا النظر في الموضوع ده، تقروا مقالنا للآخر، واللي هنتكلم فيه عن:
-هو الجنس المثلي عند أصحاب وصاحبات المهبل آمن؟
-أكتر أنواع العدوى المنقولة جنسياً شيوعاً في الجنس المثلي عند أصحاب وصاحبات المهبل؛
-نصائح لجنس مثلي آمن عند أصحاب وصاحبات المهبل.
هو الجنس المثلي عند أصحاب وصاحبات المهبل آمن؟
بالمختصر: لأ، مش آمن لو مش مستخدمين طرق حماية.
الفكرة المنتشرة اللي بتقول إن الجنس المثلي عند أصحاب وصاحبات المهبل آمن ومش محتاج حماية، ماهياش إلا خرافة. فـ دراسات كتير أثبتت إن نسبة انتقال العدوى المنقولة جنسياً عند أصحاب وصاحبات المهبل اللي بيمارسوا الجنس المثلي، مشابهة للنسبة عند أصحاب وصاحبات المهبل اللي بيمارسوا الجنس الغيري.
والعدوى دي ممكن تنتقل عن طريق تبادل السوائل الجنسية، وممكن كمان تنتقل من ممارسات جنسية تانية مش شرط تكون بتتضمن تبادل سوائل جنسية، ده بيرجع لنوع العدوى اللي الفيروس ممكن يسببها، لو موجود.
لكن المهم إننا نبقى عارفين إزاي نقدر نحمي نفسنا من العدوى دي، ونعرف نتعامل معها لو حصلت.
نصائح لجنس مثلي آمن عند أصحاب وصاحبات المهبل
١. استخدام الألعاب الجنسية بأمان
- لو بتستخدموا ألعاب جنسية، لازم تغيروا الواقي اللي بتستخدموه لكل شريك، عشان تمنعوا انتقال أي عدوى بينكم.
- لما تنتقلوا من الإدخال المهبلي للإدخال الشرجي، لازم تستخدموا واقي جديد، لأن انتقال البكتيريا من الشرج للمهبل ممكن يسبب التهابات.
- لازم تغسلوا الألعاب الجنسية كويس بالمياه والصابون بعد كل استخدام، وتأكدوا إنها نشفت تماما قبل ما تخزّنوها. وتعلّموا عن طرق غسلها أكتر من خلال التعليمات بحسب المواد المصنوعة منها.
- تجنبوا مشاركة الألعاب الجنسية مع أكتر من شخص إلا لو بتستخدموا واقي جديد لكل شريك وبتنضفوها كويس بعد كل مرة.
2. النظافة الشخصية والألفطة
- كونوا حريصين على اهتمامكم بالنضافة الشخصية، واغسلوا إيديكم قبل وبعد ممارسة الجنس. لأن بعض أنواع العدوى الجنسية ممكن تتنقل عن طريق الأيدين أو الاحتكاك الجلدي المباشر، أو الاحتكاك بين الفرجين (الكُسّين).
- لو بتستخدموا الأصابع أو الإيدين في الإدخال (fingering)، ففكّروا أنكم تلبسوا جوانتي لاتكس للحماية، خصوصاً لو فيه أي خدوش أو جروح.
- في حالة الفيستنج (إدخال اليد كاملة)، الجوانتي اللاتكس ضروري، ومعاه لازم ممكن تستخدموا كمية كافية من المزلق المائي لتقليل التهيج.
3. الجنس الفموي واستخدام الحواجز الوقائية
- لو في أي جروح، تقرحات، أو التهابات في الفم أو على الشفايف، الأفضل أنكم تتجنبوا الجنس الفموي لحد ما تلتئم الجروح، لأن ده ممكن يزيد من خطر انتقال العدوى.
- استخدموا واقي جنسي فموي (Dental Dam). الواقي ده هو سدادة مطاطية شكلها مربع، مصنوعة غالباً من اللاتكس، بتتحط على منطقة الفرج، فبتمنع انتقال العدوى الجنسية لو كانت موجودة. وممكن تتحط كمان على فتحة الشرج، في حالة أنكم بتمارسوا جنس فموي/شرجي. لكن ضروري كمان إنكم تغيروها لو بتنقلوها من المهبل للشرج.
4. العناية بعد الجنس
اعملوها عادة عندكو إنكم تدخلوا الحمام بعد الجنس. التبول بعد الجنس ضروري عند الأفراد اللي عندهم مهبل علشان بيساعد على طرد البكتيريا اللي ممكن تكون دخلت مجرى البول خلال الجنس.
5. الفحوصات والاختبارات الدورية
الاختبارات الدورية المنتظمة هي أهم نصيحة ممكن أي حد يتبعها علشان يضمن حياة جنسية صحية وآمنة، ليه ولشركائه كمان.
- اعملوا اختبارات دورية منتظمة للأمراض المنقولة جنسياً، حتى لو ما عندكوش أعراض. في كتير الحالات، العدوى ممكن تكون موجودة من غير ما تظهر أي أعراض واضحة.
- الفحوصات مش بس ضرورية للأشخاص اللي عندهم شركاء متعددين، حتى اللي في علاقات طويلة/أحادية لازم يعملوا فحوصات دورية لضمان صحتهم وصحة شركاؤهم.
علامات خدوا بالكم لو شفتوها
زي ما قلنا، في حالات كتيرة بتكون العدوى موجودة، ومابتظهرش أي أعراض … لكن في حالات تانية، بتظهر شوية علامات بتنبهنا لضرورة الفحص. عشان كده، خدوا بالكو لو لاحظتوا:
- إفرازات من المهبل أو الشرج لونها أصفر أو أخضر أو ليها ريحة.
- ألم أو حرقة خلال التبول
- حبوب، قروح، بقع، تكتلات، أو طفح جلدي حوالين الأعضاء الجنسية، الشرج، أو الفم
- حكة، حرقة، أو تنميل في المهبل أو الشرج
- نزيف مهبلي خارج وقت الحيض
- ألم خلال الجنس
- طفح جلدي على الجسم، الإيدين، أو الرجلين
الخلاصة
فيه أنواع كتير من العدوى اللي ممكن تنتقل عن طريق الجنس، بعضها بيكون واضح بأعراض زي الحكة، الإفرازات، أو القرح، وأنواع تانية ممكن تبقى موجودة في الجسم من غير أي أعراض خالص.
بعضها بيروح من نفسه، وبعضها بيعمل مشاكل لو ما اتعالجش. العدوى الفيروسية زي الـ HPV مثلاً ممكن تفضل في الجسم لفترة طويلة وماتحسوش بيها، في حين إن العدوى البكتيرية زي الكلاميديا والسيلان ممكن يظهر عليها أعراض وتتعالج بالمضادات الحيوية المناسبة. المهم أنكم تحافظوا على اختبارات دورية، علشان لو كان في عدوى وما عرفتوش بوجودها، وما تعاملتوش معاها صح، ممكن تسبب مشاكل أخطر.
علشان كده فلو لاحظتوا أي حاجة غريبة حتى لو كنتوا مش متأكدين، الأحسن تزوروا دكتور/ة علشان تطمنوا وتاخدوا العلاج المناسب في الوقت الصح.
وافتكروا إن صحتكم لازم تبقى في أول أولوياتكم، وعلى أساسها ابنوا حدودكم مع شركائكم. ما تجوش على نفسكم، وماتقدموش تنازلات على حساب صحتكم علشان حد أو حاجة.
المصادر:
https://www.who.int/ar/news-room/fact-sheets/detail/herpes-simplex-virushttps://111.wales.nhs.uk/encyclopaedia/g/article/genitalherpes/https://www.lgbthero.org.uk/safe-sex-and-stis-a-guide-for-lesbianshttps://www.abc.net.au/news/2023-07-14/safe-sex-guide-for-lesbians-and-queer-women/102478298https://www.nhs.uk/live-well/sexual-health/sexual-health-for-lesbian-and-bisexual-women/https://www.livehealthily.com/sexual-health/safer-lesbian-sex
