بيقولوا أنه الإنسان هو الكائن الوحيد اللي بيقدر يعيش علاقة جنسية كاملة يستمتع فيها ويوصل للنشوة، بدون وجود شريك تاني غيره.
مين ورا هاي المتعة كلها؟
الخيالات الجنسية.
الاستثارة الجنسية بتبدأ من العقل؛ المكان يلي بنقدر فيه بدقايق نسافر ونزور أماكن ما زرناها من قبل، نعيش فيه تجارب وخيالات جنسية بتعجبنا بدون وجود رقيب على اللي بنحبه ونستمتع فيه، وفيه بنحيي النسخة الأجرأ والأكثر فضولية من جنسانيتنا، اللي بتاخدنا لأقصى درجات اللذة … والخوف أحياناً.
وبالرغم من وجود طيف واسع جداً من الخيالات الجنسية اللي بيعيشوها الأفراد في كل العالم، إلّا أنه في عدة خيالات جنسية بيتشارك فيها قسم كبير من الناس، وممكن تلاقي واحدة أو أكتر من خيالاتك الجنسية المفضلة من ضمن هالقائمة، تعالوا نتعرف عليهم …
بس قبل، لازم نفهم أكتر شو يعني خيالات جنسية؟
الخيالات الجنسية هي قصة، لعبة، وهدية.
-“لو كان فيك تعيش يوم واحد بشخصية تانية غير شخصيتك، شو بتكون؟”
أغلبنا سأل أو انسأل هاد السؤال على الأقل مرة بحياته، أو حتى فكّر فيه سواء بقعدة رفقة، بـ موعد غرامي أول (first date)، أو بلعبة صراحة وتحدي.
بالنسبة إلي، المنطق ورا هاد السؤال كان دايماً بيحفز الفضولية بعقولنا لحتى نزور ونستكشف الأماكن اللي بتثير فضولنا ومتعتنا، ومنحب نروح عليها؛ بس بخيالنا.
لأنه ممكن مايكون منطقي ننفذ هاي الخيالات بموقعنا الحالي في الحياة لأسباب مختلفة، يمكن لأنه ما بتشبهنا بشخصياتنا وقيمنا ومعتقداتنا الحالية؛ أو لأنها بتتضارب مع معطيات تانية بحياتنا ما بنقدر نستغني عنها … بس مع هيك بتضل هاي الخيالات تشعّل جواتنا شرارة من الفضول مافيننا نتجاهلها.
مثلاً بتقول صديقتي الدكتورة أنه لو ما درست الطب كانت تحب تكون راقصة باليه رغم أنه ولا مرة شفتها بترقص أي نوع من أنواع الرقص، ويمكن لو بتجيها الفرصة حتى تترك دراسة الطب وتمارس الرقص، ما رح تاخدها.
وبيقول صديقي اللي بيعمل في التسويق الرقمي أنه أوقات بيتخيل حاله مزارع في بلد معزول وطقسه بارد، بالرغم من أنه من أكثر الأصدقاء سعياً للراحة والاسترخاء في طلعاتنا.
بالنسبة إلي، بيتقاطع هاد المفهوم بشكل كتير كبير مع الخيالات الجنسية والمعاني اللي وراها، واللي بشوفها كمكان غامض ولامع بنتفرج عليه من بعيد ونحب نزوره، بس بخيالنا، لأنه بيكون عم يحفز مشاعر كلها إثارة ولذة ومتعة.
فببساطة الخيالات الجنسية هي فكرة أو سيناريو بنخلقه في عقولنا لأمور جنسية بتسبب لنا إثارة ومتعة. هاي الأمور يمكن ما تكون مثيرة إذا نفذناها في أرض الواقع هي بس مثيرة في خيالنا، لأنه في خيالنا عقلنا بيتجاهل المشاعر المزعجة وغير المثيرة في الموقف، وبيركز على المتعة والاستثارة اللي الخيال الجنسي بيوفرلنا ياها!
وصحيح أنه الخيالات الجنسية بتخلق عنا مشاعر فضول وإثارة بس بنفس الوقت ممكن تسببلنا خوف وارتباك، لأننا فيها بنختبر أفكار ممكن تكون معقدة وغير مفهومة لإلنا. هون بنقولكمن أنه كل الخيالات الجنسية هي طبيعية، ومعظمها حتى متشارك ومتشابه بين الناس، لهيك رح نحكي بهاد المقال عن أكتر 5 خيالات جنسية شائعة.
استمروا بالقراءة؛ ممكن تلاقي خيالاتك المفضلة هون، أو تكتشف واحدة جديدة ????
تعرّفي معي على أشهر 5 خيالات جنسية
1-لعبة القوة: الـBDSM بين الحرير والفولاذ
سمعتي بهاي الحروف الأربعة من قبل؟
التقييد، التأديب، السيطرة والخضوع، السادية والمازوخية.
صحيح أنه إذا سمعنا هاي الكلمات بأي سياق تاني ممكن ننفر منها، وتحسسنا بمشاعر سلبية. بس وقت بيجي الموضوع عالجنس، بتختلف الأمور، وبيصير إلها نكهة تانية.
ممارسات الـBDSM مختلفة بأنواعها ومختلفة كمان بشدتها، فممكن تتراوح ما بين شد الشعر الخفيف، الإذلال بالكلمات، السبانكنغ (الضرب الخفيف على المؤخرة)، تغطية الأعين، لاستخدام الكلبشات “الأصفاد” واللعب مع الألم.
المبدأ الأساسي اللي بيقوم عليه الـBDSM هو الموافقة المستنيرة يعني الطرفين اللي بيقوموا بالعلاقة متفقين على اللي بيصير، وراضيين ومستمتعين. في بعض الناس اللي بيفضلوا يعيشوا تجربة الـBDSM مع شركاؤهم الجنسيين، وفي ناس تانيين بيفضلوا يحتفظوا فيها بخيالاتهمن الجنسية بدون ما ياخدوها لأرض الواقع.
مفهوم الـBDSM ممكن يمتد حتى ليتضمن ميزان القوة اللي بتقوم عليه كتير من مقاطع البورن “الأفلام الإباحية” متل: (الأستاذة/التلميذ، زوج الأم/الابنة، المدير/الموظفة)، ممكن هاي المقاطع ما تتضمن ممارسة قوة جسدية تخلينا نفكر بممارسات الـBDSM، إلّا أنه ميزان القوة النفسية اللي بيخلّي طرف من الأطراف “يُجبر” على العلاقة هو كمان يصنف تحت السيطرة والخضوع. بس تذكروا، هاد ما زال جنس رضائي لكن الطرفين بيلعبوا أدوار بتتفاوت فيها موازين القوة بهدف متعتهمن المشتركة.
من ذا سكس توك: إذا حابين تاخدوا خيال الـBDSM لأرض الواقع وتعيشوه مع الشريك، في عدة نقط لازم تخلوا بالكم منها:
- كونوا حريصين أنكم بتوثقوا بالشريك، الشريكة أو الشركاء اللي معكمن، لأنه خلال تجربة الـBDSM بنكون بواحدة من أعلى درجات تكشّفنا، والتكشّف بيحتاج للثقة.
- حطّوا حدود للعلاقة؛ اتفقوا قبل ما تبدأوا بالعلاقة عن المسموحات والمرفوضات، شو حابين تجربوا؟ شو يلي ما بتسمحوا فيه؟ وشو هي حدود المرونة تبعكمن؟
- اتفقوا على كلمة أمان، كلمة تكون مميزة ومختلفة عن كلمات التوقف العادية متل (بس، كفاية ، وقّفي) لأنه هاي الكلمات ممكن تكون متضمنة خلال العلاقة لتثير شهوتكمن أكتر، لهيك اتفقوا على كلمة أمان مختلفة لتستخدموها وقت تحبوا توقفوا خلال العلاقة.
2-آهات جماعية: العلاقة الجنسية المتعددة
على اختلاف أشكالها، إلّا أنها وحدة من أشيع الخيالات الجنسية عند الناس.
بدراسة تمت عام 2017 وانتشرت في مجلة Archives of Sexual Behavior بمشاركة 274 طالب جامعي كندي، اكتشفوا أنه 64% من المشاركين كان عندهمن اهتمام بفكرة الجنس مع شركاء متعددين.
العلاقة المتعددة ممكن تبدأ من ثلاثية، لتشمل عدد أكبر من الأفراد، وبالرغم من أنه الخيال الجنسي هاد واسع الانتشار إلّا أنه كتير من الأفراد بيفضّلوا أنه يحتفظوا فيه كخيال جنسي وما ينقلوه على أرض الواقع. (لأنه متل ما حكينا قبل، استثارتنا بالفكرة (الخيال) ممكن يختلف عن واقع الفكرة).
لكن إذا حبيت تنقلي هاي الفكرة للواقع وتعيشي هاي التجربة بالوقت اللي أنت فيه بعلاقة، فتأكدي أنك تتواصلي بوضوح مع شريكتك أو شريكك الجنسي أولاً، انقلولهمن رغباتكمن بوضوح لكن بنفس الوقت بطريقة بتقدّر مشاعرهمن اللي ممكن تكون مختلفة تجاه هاي التجربة، اسمعوهمن وتواصلوا معهمن بشكل فعّال.
3-جنس على الشاطئ، تحت النجوم أو في الغابة
أي نعم، مش بس أنت اللي بتحبي تمارس الجنس في الأماكن العامة!
فبحسب استبيان أجراه جاستن ليميلر (دكتور في علم النفس الاجتماعي)؛ تبيّن أنه 81% من الرجال و84% من النساء بتثيرهم فكرة ممارسة الجنس بالأماكن العامة. لكن الدافع وراها بكون مختلف، ففي أفراد بيُستثاروا من فكرة العرض، يعني ممارسة الجنس قدام جمهور، وفي أفراد تانيين بيكون عندهمن خيال الجنس بالأماكن العامة بس بدون ماحدا يشوفهمن، لأنه هالشي بيعطيهمن دفعة من الأدرينالين اللي بيملأ الجسم بالإثارة.
ضروري هون نكون على علم أنه بمعظم الدول ممارسة الجنس بالأماكن العامة غير قانوني فممكن تواجه تهم الفحش العام، العري غير اللائق، الفسق، والعروض الفاحشة. وحتى إذا وضعنا القانون على جنب، فممكن هاي الممارسة يكون فيها تعدّي على حقوق الآخرين. لهيك فكّر مرة تانية وقت تحب تاخد خيال جنسي لأرض الواقع.
4-جنس على الشموع ورقصة تانغو
رومانسية زيادة على اللزوم؟ ممكن، بس مش للكل؛ بل بالحقيقة هو واحد من أشيع الخيالات الجنسية كمان!
طبعاً مش ضروري يكون مع شموع وتانغو؛ لأنه الرومانسية بتعني أشياء وأجواء مختلفة لكل حدا، لكن الخيال الجنسي الرومانسي هو أكيد من الخيالات الجنسية اللي الأفراد بيختبروها بشكل واسع جداً.
العشا الرومانسي، الحميمية في المسبح، خلال حمام دافي، أو حتى التواصل البصري مع القبلة الفرنسية خلال الجنس هاي جزء من الشعور بالرغبة والاستثارة بالخيال الجنسي.
إذا كنتم بعلاقة وحابين تنقلوا هاد الخيال الجنسي للواقع وتعيشوه مع شركائكم، فتواصلوا معهمن واحكيلهمن عن هاي الرغبات، واستكشفوا شو هي الشغلات الرومانسية اللي بتحبوا تجربوها سوا، ممكن تبدأوا بجلسة ماساج بالزيوت، تجربوا وضعيات فيكمن تبوسوا بعض فيها وتطلّعوا بعيون بعض، أو حتى تخططوا لليلة رومانسية حتى تبنوا استثارتكم خلالها على نار هادية.
5-استثارة من خرم الباب
الخيال الجنسي الخامس هو التلصص على أشخاص بيمارسوا العلاقة الجنسية بدون انتباههم. وطالما هاد الشي بيكون ضمن الخيالات الجنسية اللي منعيشها أثناء الإمتاع الذاتي مثلاً، فمافي أي مشكلة، لأنه الخيالات الجنسية متل ما اتفقنا؛ طبيعية.
أما إذا لقيت أنه هاد الخيال الجنسي بيأثر عليك بشكل مبالغ فيه، فمثلاً، لو صارت عندك الرغبة بأنه تنتهك خصوصية الآخرين بمشاهدتهم أثناء ممارسة الجنس بدون علمهم وبدون موافقتهم، هنا بيتحول الخيال لاضطراب اسمه: الاضطراب التلصصي.
شو هي الإشارات اللي ممكن تخليك تفكر أنه عندك الاضطراب التلصصي؟
- إذا انتهكت خصوصية شخص ما في مكان خاص متل بيته أو غرفة تبديل الملابس مثلاً.
- إذا صورت شخص بدون إذنه
- إذا دخلت لمنطقة بشكل غير قانوني لمراقبة الناس
إذا لقيت حالك عندك مؤشرات بتخليك تعاني من الاضطراب التلصصي، لا تتردد بزيارة معالج أو أخصائي نفسي جنسي اللي ممكن يساعدك لتتغلب على هاد الاضطراب.
تذكروا أنه الخيالات الجنسية هي شيء طبيعي وبتمارسه نسبة كتير كبيرة من الناس؛ وبكتير من الأحيان ممكن نعيش هاد الخيال بشكل غير واعي وغير متعمد.
ومتل ما في خيالات جنسية شائعة متل يلي حكينا عنها بتتشاركها نسبة كتير كبيرة من الناس، في خيالات جنسية تانية أقل شيوعاً منها، لكن هاد مابيعني أبداً أنها أقل طبيعية طالما بتضل بخانة الخيالات الجنسية وما بتنتقل لممارسات ممكن تؤذي الأفراد الآخرين أو تتعدى على حقوقهمن وحرياتهمن.
ممكن تكون فكرة حلوة أنكم تشاركوا خيالاتكم الجنسية مع شركاؤكمن إذا حبيتوا، وتكون هاي نافذة تتعرفوا فيها على جوانب جديدة من علاقتكمن وتضيفولها رشة إثارة وتجديد!
أما إذا كانت هاي الخيالات بتسببلكم قلق وتوتر أو بتخليكم تنتهكوا خصوصية الآخرين أو تتعدوا على حقوقهم فاستشيروا أخصائية نفسية جنسية، ممكن تساعدكمن لتتخطوها وتلاقوا المتعة بشكل صحي بجنسانيتكمن.
مصادر:
- Gabrielle Kassel, 2019, The 7 Most Common Sexual Fantasies and What to Do About Them, Healthline, Accessed on 9 July 2024, Link
- Justin Lehmiller, 2019, 3 Sex Fantasies That Are More Common Than You Think, sexandpsychology, Accessed on 9 July 2024, Link
- Zilpah Sheikh, 2023, What Is BDSM Sex?, WebMD, Accessed on 9 July 2024, Link
- Kimberly Holland, 2018, Understanding Voyeurism, Healthline, Accessed on 9 July 2024, Link
- Esther Perel, What You Don’t Understand About Sexual Fantasies, Accessed on 9 July 2024, Link
- Callie Tansill-Suddath, 2021, Sexual fantasies are completely normal — here are the 7 most common ones according to sex therapists, Business Insider, Accessed on 9 July 2024, Link
