كل الناس مختلفة، في الأشكال والأحجام والرغبات والميول والتفضيلات والأحلام. والمتعة حق لكل فرد مهما كان مختلف.
الاختلاف مش معناه إن في حد أفضل، لكن معناه إن كل فرد بيكون ليه احتياجات خاصة تناسبه وتناسب تنوعنا كبشر.
في المقال ده هنتكلم عن أوضاع جنسية ممكن تكون مناسبة وممتعة لأفراد عندهمن قضيب حجمه “صغير”.
بس قبل ما أخذكم في رحلة تتعرفوا فيها على الأوضاع الجنسية المناسبة للقضيب الصغير لمتعة جنسية أكثر، تعالوا نفهم يعني إيه أصلاً “صغير” ومين بيحدد الحجم “الطبيعي” أو “الكبير”؟
إيه اللي بيحدد الحجم “الطبيعي” للقضيب؟
أولاً حجم القضيب بيتم قياسه وتحديده وهو في حالة الانتصاب وبيتم قياسه من أول القاع لحد أعلى رأس القضيب. المقاييس غالباً بتتضمن الطول والسُمك.
طيب إزاي بيتحدد إذا كان الحجم “طبيعي” أو “صغير”؟
في الدراسات العلمية الحجم بيتحدد بشكل نسبي وبيتم تقديم استنتاج بخصوص متوسط الحجم بناءً على الأحجام اللي تم رصدها ما بين العينة البحثية اللي تمت دراستها.
يعني إيه الكلام ده؟
يعني لو جبنا 1000 شخص (خلينا نقول إنهم ألف رجل بالغ عايشين في مصر من محافظات مختلفة)، وقسنا حجم قضيب كل واحد فيهم، الألف شخص دول هيكونوا هم عينة البحث.
ما بين الألف شخص هنلاقي إن في مجموعة منهم (400 فرد مثلاً) طول قضيبهم عند الانتصاب بيوصل ما بين (12- 15) سنتيميتر ودول المجموعة صاحبة أطول قياس في العينة.
وهنلاقي مجموعة تانية (350 فرد) طول قضيبهم عند الانتصاب بيوصل لـ (8-11) سنتيميتر ودول المجموعة صاحبة الطول المتوسط في العينة.
وهنلاقي مجموعة تالتة (250 فرد) طول قضيبهم عند الانتصاب بيوصل لـ (4-8) سنتيمتر ودول المجموعة صاحبة الطول الأقل في العينة.
وكذلك بالنسبة لقياس العرض (السمك)؛ هنلاقي إن في مجموعة منهم (200 فرد مثلاً) سُمك قضيبهم عند الانتصاب بيوصل ما بين (7-9) سنتيميتر ودول المجموعة صاحبة أكبر سُمك في العينة.
ومجموعة تانية ( 500 فرد) سُمك قضيبهم عند الإنتصاب بيوصل ما بين (5-6) سنتيميتر ودول المجموعة صاحبة السٌمك المتوسط في العينة.
ومجموعة تالتة (300 فرد) سُمك قضيبهم عند الانتصاب بيوصل ما بين (2-4) سنتيمتر ودول المجموعة صاحبة السُمك الأقل في العينة.
لكن خلي بالكم، المجموعة صاحبة أطول قضيب في عينة البحث مش لازم تكون هي نفسها العينة صاحبة السمك الأكبر.
في ناس بتكون عندها قضيب طويل ورفيع، وناس عندها قضيب قصير وسميك!
بناءً على النتائج دي من العينة دي، ونتائج أبحاث تانية مع عينات تانية أكبر وفي مناطق مختلفة من العالم، العلماء يقدروا يقدموا نسب عن متوسط حجم القضيب.
في حالة البحث الافتراضي اللي قدمناه كمثال ده نقدر نقول إن متوسط طول القضيب عند الرجال البالغين في مصر هو 9.5 سنتيميتر، ومتوسط السٌمك هو 5.5 سنتيميتر.
وبالتالي أي رجل بالغ يقدر يبص على المتوسط ده ويحسب هل حجم قضيبه أكبر من المتوسط، في المتوسط، ولا أقل من المتوسط!
بس حتى الحجم المتوسط ده بيختلف من مكان لمكان وعلى حسب عينة البحث كمان..
يعني مثلاً في مراجعة تمت سنة 2020 على 10 دراسات علمية اتعملوا عن حجم القضيب، نتائجها كانت بتقول إن الحجم “المتوسط” هو 13.97 سم، وفي دراسة ثانية من الجمعية الأمريكية لجراحة المسالك البولية قالت إن الحجم “المتوسط” هو 8.8 سم
وعشان كده كلمة “حجم طبيعي” هي كلمة غير منطقية أو واقعية لأنه أي حجم للقضيب هو طبيعي طالما يؤدي دوره في حياة الشخص، ومش بنقصد هنا الدور “الجنسي” بس، لكن كمان دوره في عملية التبول مثلاً.
نرجع للقضيب “الصغير”؛ زي ما اتفقنا، أحجام أعضاؤنا هي أحجام نسبية فكلمة قضيب صغير معناها إن القضيب حجمه أقل من المتوسط العالمي أو المحلي بناء على الدراسات، أو هو إحساس شخصي من أصحاب وصاحبات القضيب إنهم كان عندهم رغبة في قضيب مختلف بحجم “أكبر” من الحالي!
مش بالطول .. بالمفعول!
المثل الشعبي “مش بالطول .. بالمفعول” فيه وجاهة وجاي من تجارب شعبية مهم نحطها في بالنا، عشان كده بنشارككمن أوضاع جنسية تعلي المفعول وتخليكم مستمتعين/ات أكتر بالإدخال في علاقتكم الجنسية مع شركائكمن لو أنتو من أصحاب وصاحبات القضيب الصغير/القصير.. ولو لأ كملو برضه المقالة، يمكن تحتاجوها في يوم من الأيام!
الأوضاع الجنسية المناسبة لأصحاب وصاحبات القضيب الصغير
ودلوقتي، يلا بينا نشوف الأوضاع الجنسية اللي تناسب أصحاب وصاحبات القضيب وخاصة “الصغير”!
1- الدوجي- وضعية قرفصة الكلب
لو ضحكتوا على الاسم، فأنا كمان ضحكت وأنا بترجمه!
الوضعية دي مناسبة لأنها بتساعد إن القضيب يكون محسوس بيه بالكامل وقت الإدخال، غير أن الوضع ده بيثير ناس كتير لأنهم بيحسوا بالتحكم، عشان الشريك/ة بيكونو نازلين على إيديهم وركبتهم. ابعتولنا ترجمة أحسن من دي لو عندكم أفكار!
2- الـ reverse cowgirl- وضع رعاة البقر المعكوس
اللغة العربية مش مساعدانا!
ده الوضع اللي بيكون فيه الشريك/ة قاعدين على القضيب بشكل معكوس، الوضع ده بيساعد برضه أصحاب وصاحبات القضيب على الاسترخاء، وبيخلي الشريك/ة عندهم تحكم في الحركة والسرعة بالشكل اللي بيفضلوه، عشان يحسوا بمتعة أكبر.
3- The spork- وضع الشوكة
وضع الشوكة هو أن الشريك/ة يكونوا نايمين على ضهرهم، مع رجل واحدة مفرودة، والتانية مرفوعة، وصاحب/ة القضيب بيكون بين رجلين الشريك/ة. الوضع ده بيخلي في إمكانية للإدخال بعمق، والشعور بالقضيب بشكل كامل، عشان بتكون الزاوية سامحة بالحركة أكتر، ورؤية الشريك/ة كمان بالقرب ده، بيسمح بالتقبيل والكلام والنظر في العينين لإثارة وحميمة أكتر.
4- The Flatiron أو وضع المكواة!
فاكرين وضع الدوجي؟ ده شبهه بس بيكون الشريك/ة مستلق/ية تماماً على بطنه/ا، وفارد/ة جسمه/ا، مع فتح الرجلين بشكل بسيط للمساعدة على الإدخال، في الوضع ده أصحاب وصاحبات القضيب اللي بيقوموا بالإدخال بيكونوا فوق، ومحملين بجسمهم شوية على الشريك/ة، وده برضه بيزود الشعور بكامل القضيب ودخوله بأقصى قدر لمتعة أكبر.
قفل الرجلين والضغط عليهم مع الشعور بتقل جسم الشريك/ة بيساعد على زيادة المتعة عند ناس كتير، عشان كده الوضع ده بيكون مناسب ليهم!
5 – scissors- وضع المقص
في ناس كتيرة فاكرة إن وضعية المقص، مقتصرة على أصحاب وصاحبات المهبل، وخاصة المثليات، لكن ده مش حقيقي. وضع المقص مع الإدخال مناسب للجميع، خاصة أصحاب القضيب الصغير، لأنه بيكون فيه الرجلين في وضعية المقص، وبيكون في احتكاك بالجلد والرجلين مش بس الإدخال، وده شيء بيزود الإثارة والمتعة. كمان في الوضع ده الشركاء يقدروا يكونوا بيتواصلوا أثناء الإدخال وشايفين بعض كويس، مع قدرة على التحكم من الطرفين بسهولة!
6- Knees To Chest- وضع الركبة على الصدر
وده وضع بيكون فيه الشريك/ة نايمين على ضهرهم على طرف سرير أو ترابيزة (طاولة) مع وضع الركبة عند صدر صاحب/ة القضيب اللي بيقوموا بالإدخال، وتحريك الرجلين وضمهم أكتر للصدر، عشان إحساس الضيق ده يسبب متعة أكبر للطرفين، وفي نفس الوقت حركة القضيب بتكون سهلة.
7- Face-off – وضع وش في وش
وضعية وش لوش هي وضعية حميمية رومانسية، عشان فيها بيكون الشركاء حاضنين بعض وشايفين بعض كويس، وفيها الشريك/ة بيكونوا قاعدين على رجلين صاحب/ة القضيب اللي بيكونو قاعدين على كرسي مريح وبيقوموا بالإدخال وبيتحركوا حسب رغبتهم ببطء أو سرعة. الوضع ده بيسهل الإدخال بعمق، مع مساحة للتقبيل واللمسات الحميمية والمثيرة.
في النهاية٬ أكيد في أوضاع أكتر ممكن كل شخص يكتشفها بالتجربة، بس حبيت أشارككم بعض الأوضاع اللي ممكن تساعدكم على الإحساس بالقضيب بشكل أكبر، لو عارفين أوضاع تانية وتحبوا تشاركوها معانا، ابعتولنا عشان نتعلم سوا!
وأهم حاجة تفتكروا إن الجنس مش فقرة استعراضية، لكن بالتواصل والإحساس والحركة والأوضاع المناسبة مع إثارة كافية.. تقدروا تستمتعوا بشكل كبير زي ما تحبوا! وافتكروا كمان إن الجنس مش مقتصر على الإدخال! وإن في ممارسات تانية كتيرة ممكن تبسطكم.
ودي قائمة بمصادر ومقالات تانية ممكن تعرفو منها معلومات أكتر عن الموضوع
- Promescent. (n.d.). Best sex positions for a small penis. Retrieved May 22, 2024, from https://www.promescent.com/ar/blogs/learn/best-sex-positions-for-a-small-penis
- Men’s Health. (2018, March 22). The best sex positions for guys with small penises. Retrieved May 22, 2024, from https://www.menshealth.com/sex-women/a19546200/best-sex-positions-for-guys-with-small-penises/
- Refinery29. (n.d.). Small penis sex positions. Retrieved May 22, 2024, from https://www.refinery29.com/en-au/small-penis-sex-positions#slide-13
- Healthline. (2023, April 18). Average penis size: What’s normal and does size matter? Retrieved May 22, 2024, from https://www.healthline.com/health/mens-health/average-penis-size#:~:text=The%20average%20penis%20size%20is%20not%20nearly%20as,penis%20is%20between%205.1%20inches%20and%205.5%20inches
- Cordeiro, K. R., Caticha, G. A. R., Ribeiro, R. J., & Tamanini, J. T. N. (2020). **Sexual satisfaction of people with small penis size and its relationship with body image, sexual behavior, and sexual orientation**. *Journal of Sex & Marital Therapy, 46*(6), 577-590. https://doi.org/10.1080/0092623X.2020.1787279
- Gonzalgo, M. L., & Trock, B. J. (2001). Renal cell carcinoma: Incidence, therapy, and outcome. The Journal of Urology, 165(5), 1611-1616. https://doi.org/10.1016/S0022-5347(01)65682-9
